. O Secretario de Acción Electorai do PSdeG, Martín Seco, membro da dirección galega en funcións do PSdeG, reprobou hoxe “a falta de aposta pola integración” de Valentín González Formoso, cuestionando así a “nula veracidade” do discurso de integración co que se presentou ás primarias o secretario xeral electo.. O Secretario de Acción Electorai do PSdeG, Martín Seco, membro da dirección galega en funcións do PSdeG, reprobou hoxe “a falta de aposta pola integración” de Valentín González Formoso, cuestionando así a “nula veracidade” do discurso de integración co que se presentou ás primarias o secretario xeral electo.

Logo de que Formoso requirira o cambio do comité organizador do 14º Congreso Nacional do PSdeG, Martín Seco subliñou que “Formoso opta por restar e purgar en vez de sumar". Segundo Seco, o secretario xeral electo "empeza mal se purga” aos compañeiros e compañeiras elixidos polo Comité Nacional Galego, máximo órgano do partido en Galicia, para organizar o Congreso.

Seco amosou “respecto” pola resolución federal, pero considera que Formoso erra politicamente ao non comunicar a súa posición á executiva galega, cuxo mandato está vixente ata o congreso, a pesares da boa disposición da dirección galega en funcións a colaborar co equipo de Formoso.
Probas diso son o correo enviado pola Comisión Organizadora a Formoso o día 5 para poñerse á súa disposición “para calquera indicación, orientación global ou texto, así como para a incorporación de relatores ou material” de cara á finalización da redacción da ponencia marco que está sendo redactada, ou o feito de que o propio Gonzalo Caballero lle trasladase esta mesma disposición en persoa.

“A nosa estratexia é contribuír entre todos e todas para facer o mellor traballo posible para a nova etapa, pero parece que algúns só entenden a integración de boquilla”, reprobou, antes de lamentar que “algúns seguen na estratexia de menoscabar ao partido con filtracións interesadas aos medios de comunicación, como levan facendo dende o día en que Gonzalo Caballero gañou as primarias”.

Neste senso, o dirixente socialista recordou a Formoso que “agora xa non ten que seguir facendo oposición a Gonzalo Caballero”, senón que cómpre que “empece a traballar en clave colectiva”. “Este xeito revanchista de actuar cos compañeiros e compañeiras vai na liña completamente oposta á de unir o partido para seguir fortalecendo o proxecto socialista en Galicia”, advertiu.