A milonga xustificativa que nos contan....?, pero ocultan de que partiu a idea e o interés por irse a Venecia con todsos os gastos pagos con diñeiro público. E o que é mais que GRAVE a clara competencia desleal financiada con cartos públicos incurrindo nas funcions dos concellos da Costa da Morte, entes de Turismo e da mesma Consellería de Turismo da Xunta de Galicia, a FISCALÄI debería abrir unha investigación sobre estes desvio desproporcionado de cartos públicos para pagar turismo institucional a catro amigos dos autores da convocatoria..
A área de Turismo da Deputación da Coruña promocionará a Costa da Morte na 15ª Exposición Internacional de Arquitectura da Bienal de Venecia cos proxectos dos estudos de arquitectura Creus&Carrasco e Elsa Urquijo. Por outra banda convoca unha nova liña de axudas para concellos de menos de 50.000 habitantes co fin de financiar os gastos de persoal das oficinas de turismo. O obxectivo é garantir o funcionamento de servizos de información turística en pequenos e medianos concellos.
O Faro Vilán (Camariñas) foi o escenario escollido pola área de Turismo da Deputación da Coruña para a presentación da participación na 15ª Exposición Internacional de Arquitectura da Bienal de Venecia cos proxectos dos estudos de arquitectura Creus&Carrasco e Elsa Urquijo con proxectos inseridos na Costa da Morte.
O deputado de Turismo, Xosé Regueira xunto cos arquitectos Juan Creus, do estudo Creus&Carrasco e María Veiga e Ignacio Sánchez, do estudo Elsa Urquijo foron os encargados de presentar os proxectos cos que a Deputación da Coruña asiste por vez primeira á 15ª Exposición Internacional de Arquitectura da Bienal de Venecia co fin de promocionar a Costa da Morte.
"Trátase dunha oportunidade magnífica para estar nun escaparate singular como é a Bienal de Venecia con proxectos de arquitectura singular como os que se mostran na exposición", sinalou Xosé Regueira. "A Deputación non pode senón mostrar o orgullo polo traballo destes dous estudos e agradecer a posibilidade de participar nese evento tan importante a nivel do mar e que este territorio de Fisterra se leve a todo o mundo", explicou o deputado.
A Deputación da Coruña participa nesta edición da Bienal de Venecia coa finalidade de por en valor, fomentar e promover a oferta e riqueza turística da Costa da Morte nun evento de grande prestixio e impacto no mundo da arte ao que asisten anualmente centos de milleiros de persoas no que é a exposición internacional de arte máis antiga do mundo. A Bienal de Arquitectura é unha sección da Bienal de Venecia creada en 1980 co obxectivo de mostrar e desenvolver propostas, así coma ofrecer unha ferramenta para a práctica innovadora no contexto urbano nacional e internacional e está considerada o máis grande escaparate de arquitectura europea.
As propostas dos estudos de arquitectura convidados mostrarán un dos principais xeodestinos da provincia da Coruña, acompañando os proxectos con vídeos do patrimonio arquitectónico e natural da Costa da Morte.
O arquitecto Juan Creus agradeceu á Deputación o apoio para levar un traballo que, segundo definiu "explica non só as nosas obras senón o territorio da Costa da Morte xa que a arquitectura resolve un problema que está no contexto. A nosa proposta dilúe territorio e arquitectura para xuntala", dixo. Considerou, "unha grande oportunidade pola súa inmensa difusión" non só para o traballo do seu estudo senón para a Costa da Morte en que se insiren.
O proxecto do estudo Creus&Carrasco , titulado "Transitions in context", define a relación da arquitectura e territorio nun contexto. Recolle, segundo explicou Juan Creus, proxectos construídos e deseñados para o espazo que vai desde Malpica a Louro e xoga coa relación de elementos de mar e terra. A partir dun plano en que sitúan as súas obras tiran unhas pautas en que aparecen as referencias do territorio e as súas obras inseridas. A maqueta de 2x1,40 m componse dunha base de tiras que representan o territorio con imaxes nas que se encastran unhas pezas cos proxectos do estudo que se cruzan coas referencias do territorio. A lonxa de Fisterra, vivendas de Louro, Quilmas, Cee ou Corcubión, o albergue Bela Muxía e a Casa Chao en Corcubión son algúns dos proxectos que se exporán na maqueta que foi tamén elaborada na Costa da Morte.
María Veiga e Ignacio Sánchez, do estudo Elsa Urquijo, levarán á Bienal o seu traballo co elemento común que é o propio modo de traballar, "o quen somos e como somos que vén tamén de onde somos". "A intervención quere crear un espazo onde se reflicta esta sensibilidade e sexa capaz de trasladar ao visitante até o noso territorio", destacaron dun proxecto galaica que situará na sala "un espazo central pechado e no seu interior a través da auga, a luz e o son evocarase o introspectivo e o infinito. A auga estará contida dentro dunha peza, testemuña do material". A música da instalación será a interpretación do Canto da Sibila, das Cantigas de Afonso X o Sabio.
Arredor do volume central exporanse, por medio de pantallas de vídeo, "fragmentos da nosa percepción do territorio e da nosa obra. Imaxe que reflictan os trazos e a síntese do que somos", explicaron.
O estudos Creus&Carrasco e Elsa Urquijo de arquitectura foron convidados a participar na exposición organizada pola GAA-Foundation, no contexto da Bienal de Arquitectura de Venecia 2016, na exposición denominada "TIME-SPACE-EXISTENCE", instalada no Palazzo Mora e Palazzo Bembo, situados no centro de Venecia, a carón da ponte Rialto.
A GAA Foundation é unha fundación sen ánimo de lucro fundada en 2002 polo artista alemán René Rietmeyer que, ao través da reflexión dos conceptos de tempo, espazo e existencia, leva dende 2012 xestionando estes recintos e contidos no contexto da Bienal de Venecia. Dende 2014 conta co apoio da Fundación Mies Van der Rohe que, entre outros, promove o Premio Europeo de Arquitectura Contemporánea ao que, na súa última edición, foi nomeada Casa Chao, en Corcubión, obra de CREUSeCARRASCO.
Ademais dos visitantes que acudan á Bienal de Venecia, a repercusión incrementarase pola edición dun catálogo sobre o traballo de 370 páxinas con 10.000 unidades publicadas e a emisión de 35.000 convites para os eventos que terán lugar dende a inauguración en Maio ata o seu peche en Novembro de 2016. Todo isto, sumado a unha afluencia de visitantes que se estima en torno aos 150.000, converte á Bienal de Venecia 2016 nunha extraordinaria oportunidade para a promoción turística do xeodestino da Costa da Morte.
A deputación da Coruña convoca unha nova liña de axudas para concellos de menos de 50.000 habitantes co fin de financiar os gastos de persoal das oficinas de turismo. O obxectivo é garantir o funcionamento de servizos de información turística en pequenos e medianos concellos.
A área de Turismo da Deputación da Coruña convoca por vez primeira unha liña de subvencións específica para o financiamento das retribucións do persoal técnico para oficinas de turismo de concellos e agrupacións de concellos con poboación inferior a 50.000 habitantes por un período mínimo de 4 meses durante o ano 2016. O importe máximo da subvención será de 20.000 €.
A convocatoria contempla que as oficinas ofrezan información local e tamén do xeodestino no que se insiren ademais da provincia da Coruña. A nova liña insírese na estratexia de promoción da área de Turismo, que dirixe o nacionalista Xosé Regueira, de apostar por un turismo sustentábel e de calidade artellado en seis xeodestinos coas súas particulares potencialidades. "Rías Altas: Ferrolterra e Eume", "Rías Altas: A Coruña e As Mariñas", "Costa da Morte", "Terras de Santiago", "Rías Baixas: Ría de Muros e Noia" e "Rías Baixas: Ría de Arousa" son os seis destinos que centran a oferta cultural da Deputación da Coruña que se verán promocionados tamén a través das oficinas de información locais que se potencian con esta nova liña de apoio para dotalas de persoal técnico especializado. A liña reverterá tamén na creación de emprego no sector turístico.
O persoal técnico contratado deberá posuír algúns dos seguintes títulos: Técnico superior en Guía, Información e Asistencia Turística, Técnico en Empresas e Actividades Turísticas, Grado ou diplomado en Turismo ou equivalente, Grado ou licenciatura en Historia da Arte ou Grao ou licenciatura en Humanidades.
Máis información http://bop.dicoruna.es/bopportal/publicado/2016/05/11/2016_0000003669.html
- 
Este Xornal 