A concelleira Milagros Lantes recolleu o premio acompañada polo arquitecto xefe da OTM

A concelleira de Planificación e Desenvolvemento Urbano, Milagros Lantes, recolleu en Villanueva de la Serena (Badaxoz) o Premio Cidades que Camiñan 2018, outorgado aos concellos de Cádiz, Herrera de Duque e Carballo polas súas políticas de fomento da mobilidade peonil no bienio 2017-18. A concelleira acudiu ao Congreso da Rede de Cidades que Camiñan acompañada polo arquitecto xefe da Oficina Técnica Municipal, Alfredo Garrote.

Nos vindeiros días faranse públicas as conclusións do congreso, pero desde a asociación avanzan que a Rede de Cidades que Camiñan sae reforzada da súa asemblea anual, “e proxectamos novos retos para converternos no referente ibérico da mobilidade peonil urbana”, segundo indican.

A concelleira Milagros Lantes expuxo na xuntanza as liñas básicas do proxecto polo que o noso concello foi galardoado nesta edición dos premios, e no que se inclúen tanto medidas estruturais coma non estruturais encamiñadas á consecución de obxectivos coma a mellora da escena urbana e da calidade do espazo público, o protagonismo do peón, a redución dos atropelos, a mellora da calidade do aire, a introdución da bicicleta nos desprazamentos urbanos e a participación activa da cidadanía nas políticas de mobilidade sostible, entre outros.

O congreso celebrouse en Villanueva de la Serena (Badaxoz)

Esas son as liñas mestras, por exemplo, da estratexia de mellora e xestión do espazo público que está en fase de elaboración ou a ordenanza reguladora do tráfico, a mobilidade e a seguridade viaria que se presentará para a súa aprobación polo pleno da corporación, con toda probabilidade, en novembro.  E tamén son as que marcan as actuacións urbanizadoras realizadas entre o ano pasado e o actual nas rúas Desiderio Varela, Martín Herrera, Ponte, Xúpiter, avenida das Flores, avenida de Bértoa, Chorís, contorna do CEIP San Luís Romero, contorna do CEIP A Cristina, rúa Sol e rúa Río (as 4 últimas en execución), así como a eliminación de barreiras nas rutas escolares ou os proxectos que temos en carteira para seguir actuando na mellora urbana, en concreto nas rúas Barcelona, Tarragona, Luis Calvo, Perú, Xílgaro, Luis Braille ou Bos Aires.

Ademais do recoñecemento ao traballo que se está levando a cabo, o Premio Cidades que Camiñan inclúe a publicación editorial dos proxectos polos que cada cidade merece o galardón, a organización dun concurso de ideas para a rexeneración dun espazo público e a opción a organizar a seguinte edición do congreso.