Desde CIG-Saúde temos denunciado en diversas ocasións o grave deterioro dos servizos sanitarios na comarca de Bergantiños en xeral, e en particular con respecto ás poucas especialidades médicas ás que ten acceso a poboación desta comarca no Centro de Especialidades de Carballo. Asistimos desde hai máis dun mes a un agravio máis ás persoas desta comarca, en concreto aos pacientes que acuden a revisións oftalmolóxicas no Centro de Especialidades de Carballo. Resulta que desde hai máis dun mes están bloqueadas as axendas e non se poden citar revisións para a especialidade de oftalmoloxía, estando xa completas as citas para todo este ano 2018 e pechadas as listas do 2019.

Si, aínda que pareza incríbel, apenas iniciado o ano 2018 completáronse as axendas de revisións desta especialidadade para todo o presente ano, o que indica que as citas dispoñíbeis son moi poucas, claramente insuficientes.

Anteriormente, cando se daban este tipo de situacións, as citas pendentes quedaban nun buzón e logo cando abrían as listas citábanse e os pacientes recibían as súas citacións por correo ordinario, mais agora o Sergas seica non quere gastar no envío de cartas á xente (prefire adicar millóns de euros ás privatizacións de servizos e aos concertos coa sanidade privada), e obriga os pacientes a ter que estar preguntando continuamente se abriron as listas para as revisións oftalmolóxicas. Así, todos os días son moitas as persoas que preguntan no Centro de Especialidades se abriron as listas para as revisións de oftalmoloxía, e así cada día desde hai máis dun mes. Pacientes que tiñan que facer a revisión en setembro e outubro deste ano xa non a poderán facer, como moi pronto, ata xaneiro do 2019, e para iso teñen que estar preguntando a diario se abriron as listas para poder coller a cita en canto abran pois senón a saber cando poderán facer a revisión.

Esta é unha mostra máis do que está a pasar no Centro de Especialidades de Carballo, un deterioro continuo dos poucos e bastante precarios servizos que se prestan á poboación da comarca de Bergantiños, un centro que en vez de incrementar os servizos á poboación venos reducindo desde hai tempo, con eliminación dunha consulta de cirurxía (agora só hai unha consulta os mércores) unha de toco-xinecoloxía (quedando unha única consulta), ecografías só un día á semana e agora con esta situación respecto ás revisións de oftalmoloxía que, no mellor dos casos, verán retrasadas as citas en dous ou tres meses e iso se non se despistan e están pendentes continuamente de cando abren as listas. Un trato denigrante que non merece a poboación desta comarca.